塩麴芝麻麵包 & 胡蘿蔔麵包

將胡蘿蔔加奶打碎加落麵糰的麵包,質感軟又有彈性...比想像中好味!
因為原食譜係將胡蘿蔔蒸熟,我無所以都驚成品會唔好味....
第一轉買的加朋友比的白神酵母用哂,今轉去旅行買大包裝的唔想開住,
因為之前買的安琪...雪櫃仲有包,再加埋大嫂買幾包新的比我,真係有排用....
一向對中國制的食品無信心,但係呢個安琪酵母真係唔錯,
味道同發酵力都好好,雖然放入雪櫃好耐,但麵包一樣發得好靚!

椅套

今日的起心肝做椅套,後面加個袋比老公放鍵盤,
亞仔去咗特訓,老公番工,以為可以靜靜一邊聽歌一邊做手工,
點知朋友不停 WhatsApp 吹水,攪到手忙腳亂!
自從開始做手作,就不停咁買多過做,除咗扔棄,
唔知呢一世可唔可以清哂手頭上的布以及手作用品!
橙色仙人掌好可愛,又好實用,係好耐以前係12蚊店買的!

西多士

幫代購訂的 Silicon Food Holder 終於到手, 立即囉嚟試用,
真係唔錯,以前煎西多士,裡面一夾材料,就好煩,d餡好易走出嚟,
用呢個夾得好好...轉方向都好易控制!

冷藏發酵鬆餠

已經好耐無買出面D現成鬆餠粉用,因為怕D泡打粉含鋁,
見到呢個冷藏食譜係用酵母,所以就試吓做!又可以清吓D低粉....
成品比我預期好味,而且材料用咗蜜糖,所以食時唔係好甜,但煎時就好香,
搽楓糖醬/果醬/北海道練奶三份唔同的鬆餠,簡單的完成假日早餐

我做的麵糊份量 (3-4人份量) :

在盆內倒入 105g 蛋 330g 奶 75g 蜜糖

用打蛋器攪拌均勻

加入已經篩好的 300g 低粉 和 1.5g酵母

攪拌到光滑細緻,加入融化的30g 牛油攪勻

包保鮮膜發酵60分鐘,用杓子攪拌排出空氣

讓質地扎實,放入雪櫃發酵12-15小時,

約膨脹成2.5倍就OK

煎時,用杓子打圈方式攪吓,排出空氣就可舀出

喜好份量,倒入平底鑊中小火煎